Deporte, música, actividades infantís, verbenas e concertos no sábado de San Telmo
A carreira de San Telmo bate récord e supera os 700 inscritos. Actuará o rapeiro Arce, Dj Mesu e Dj Enter, La Patrulla e o grupo América amenizará a verbena.
Tui prepárase para vivir e gozar a gran fin de semana das Festas de San Telmo. Mañá sábado haberá deporte, música, actividades infantís, verbenas e concertos.
A xornada comeza con deporte coa celebración a partir 11 h, no Paseo da Corredoira, da Carreira Popular de San Telmo que bate record de participación con 738 persoas inscritas. É solidaria con SOS Tomiño Baixo Miño, xa que as persoas inscritas entregan un quilo de alimentos na recollida do dorsal.
A charanga A Tu Ritmo amenizará as rúas tudenses durante dúas horas e dende as 12 h, actuación que tamén repetirán ás 20h da tarde. Ás 17 h será a quenda do pasarrúas de Troula Animación e o seu espectáculo ‘Circo’, pase que repetirán ás 19 h. Mentres, ás 18 h, a cita será para os e as máis pequenas da casa co teatro musical ‘Canta Xoga’ de Migallas Teatro.
Co caer da noite, ás 21 h na rúa Compostela actuará o Grupo América, previa do concerto para público xuvenil do rapeiro Arce, DJ Mesu e DJ Enter ás 22 h no Espazo Feiral. Á mesma hora, na carpa da Corredoira actuará o grupo La Patrulla e, xa ás 12 da noite comezará o segundo pase do Grupo América na rúa Compostela até ben entrada a madrugada.