Campamentos urbanos e deportivos de verán 2013 do Concello de Tui

Luns, 27 de maio de 2013. A Concellería de Deportes do Concello de Tui organiza os Campamentos Urbanos e Deportivos de Verán 2013, que se levarán a cabo durante o mes de xullo e a primeira quincena do mes de agosto.

Dado o éxito dos campamentos do ano pasado, a Concellería de Deportes tudense aposta por aumentar unha quincena máis, das dúas que se realizaron na pasada tempada, contando con dúas quendas no mes de xullo e unha máis na primeira quincena de agosto.

Os campamentos urbanos e deportivos de verán van destinados aos nenos/as e mozos/as de Tui con idades comprendidas entre os 3 e os 12 anos (idades cumpridas ao inicio de cada quenda), co fin de ofrecer unha alternativa lúdica-deportiva-educativa aos cativos/as do noso concello. Ademais, co desenvolvemento destes campamentos, preténdese ofrecer unha alternativa aos pais e nais que traballan durante ese período, para que podan conciliar así a vida familiar e laboral.

As inscricións realizaranse na secretaría do Concello de Tui, dende o día 3 ata o 11 de xuño, no horario de 09.00 a 14.00 horas, entregando cumprimentado o formulario de solicitude xunto á documentación requirida nas bases, que poden consultarse na páxina web do Concello de Tui www.concellotui.org ou na secretaría do concello.

Para o Concelleiro de Deportes, Nicolás Lorenzo, os campamentos urbanos e deportivos de verán son unha oportunidade para crear espazos de convivencia e socialización para os nenos e nenas de Tui. Nas actividades previstas pretendese o fomento de hábitos de vida saudables, a educación en valores, o respecto a un mesmo e aos demais así como ao noso entorno, artellado entre torno á practica deportiva e de xogos.