Até o 18 de abril aberto o prazo de presentación de solicitudes para DepoTermal
Até o 18 de abril está aberto o prazo para presentar as solicitudes para participar no programa DepoTermal promovido pola Deputación de Pontevedra e no que poden participar as persoas empadroadas en Tui, ou noutro concello da provincia de Pontevedra.
DepoTermal ten por finalidade fomentar o envellecemento activo e mellorar a calidade de vida das persoas, establecendo novas relacións sociais, favorecendo a participación en actividades que melloran o seu estado anímico, potenciando movementos de participación e cooperación social e promovendo espazos de encontro e intercambio de experiencias co fin de evitar o illamento e as situacións de soidade que poidan levar á vulnerabilidade.
O plan termal oferta dous programas:
- Programa de asistencia diaria a balnearios durante cinco días consecutivos
- Programa termal con pernoita
Tui é un dos concellos da provincia de Pontevedra que se suma ao plan mediante mediante un acordo de adhesión.
Entre os requisitos para poder participar están:
- Estar empadroado/a na provincia de Pontevedra
- Non padecer ningunha enfermidade ou patoloxía incompatible coa actividade
- Ter nado antes do 1 de xaneiro de 1968, feito que se deberá acreditar cunha fotocopia do documento nacional de identidade (DNI) ou co número de identidade de estranxeiro (NIE), segundo o caso
- No caso de nacer o 1 de xaneiro de 1968 ou con posterioridade, ter a condición de pensionista polos conceptos de xubilación, invalidez, viuvez ou outras pensións, para o que se deberá presentar unha fotocopia do certificado correspondente
- No caso de nacer o 1 de xaneiro de 1968 ou nunha data posterior, ter recoñecido un grao de discapacidade igual ou superior ao 65 %, o que se acreditará coa tarxeta ou certificado de recoñecemento do grao de discapacidade
- Precisar un respiro familiar, o que se acreditará mediante o modelo de informe da traballadora ou traballador social dos servizos sociais comunitarios básicos.
- No caso de persoas que desexen participar no plan de forma conxunta é preciso que as dúas persoas cumpran os requisitos esixidos nestas bases.
As persoas beneficiarias deben reunir ademais os seguintes requisitos:
- Non padecer alteracións de comportamento que poidan perturbar a normal convivencia nos establecementos nin enfermidades transmisibles con risco de contaxio
- Poder valerse de maneira autónoma para as actividades da vida diaria
As persoas interesadas poden presentar a solicitude nos Servizos Sociais Comunitarios na casa do concello de Tui, xunto coa seguinte documentación:
- Fotocopia do DNI/NIE.
- Volante de empadroamento do ano en curso.
- Certificado de pensións, só no caso de persoa solicitante/acompañante nacera no ano 1968 ou posterior e ter condición de pensionista de ser pensionista.
- Certificado ou tarxeta acreditativa do recoñecemento do grao de discapacidade igual ou superior o 65% da persoa solicitante e acompañante, se procede.
- Informe emitido polos servizos sociais comunitarios básicos que acredite a necesidade de respiro familiar da persoa solicitante e acompañante, se procede.