Facebook Twitter Vimeo Instagram Youtube

Obradoiros infantís de cociña, música en directo, tapas e sorteo este sábado na Praza de Abastos de Tui

24/05/2022

Estas actividades forman parte da campaña “Quere o teu mercado”

A praza de abastos de Tui celebrará este sábado, 28 de maio, o Día do Mercado sumándose á campaña internacional “Quere o teu mercado”. O obxectivo da mesma é atraer clientela ás prazas de abastos, incentivar o consumo  de produtos frescos, resaltar os valores da compra local e destacar a profesionalidade das praceiras e praceiros.

Así a praza tudense acollerá o sábado obradoiros infantís de cociña, música en directo e degustación de tapas e un sorteo.

A actividade comezará ás 11 h con obradoiros de cociña, para nenos e nenas, de 6 a 12 anos.  Durante dúas horas os cativos e cativas elaborarán receitas con produtos do mercado para fomentar unha alimentación saudable e concienciar sobre o consumo de produtos de proximidade. As prazas son limitadas polo que é preciso inscribirse previamente en comercio@tui.gal. Recibirase confirmación da inscrición que se realizar por orde de chegada até esgotar as prazas dispoñibles.  

Ás 13 h será o momento da música en directo da man de Lara Villaverde. No repertorio que interpretará figura “Un Guerrilleiro”, poema de Florencio Delgado Gurriarán, no que estará acompañada por Fran Gómez, que entre outros temas interpretarán.

Acompañando a actuación musical poderanse degustar, de balde, tapas elaboradas con produtos do mercado. Amais entre todas as persoas que o sábado realicen as súas compras no mercado sortearase unha cesta de produtos frescos en colaboración cos praceiros e praceiras do mercado.

A campaña “Quere o teu mercado” está promovida a nivel internacional pola World Union of Wholesale Markets ( Unión Mundial de Mercados Maioristas) para visibilizar o modelo dos mercados de proximidade. En Galicia a campaña é promovida pola Dirección Xeral de Comercio e Consumo dependente da Vicepresidencia Primeira e Consellería de Economía, Industria e Innovación, en colaboración cos concellos e as propias prazas de abastos.

 

A concelleira de Comercio e Mercado do Concello de Tui, Ana Núñez, destaca que con esta iniciativa búscase incentivar a compra na praza de abastos de Tui, ao tempo que atraer a novos clientes. Lembra que no mercado “podemos atopar produtos frescos de alimentación  coma carnes, lácteos, froitas, verduras, peixes,…” e o consello experto e profesional dos praceiros e praceiras.

 

O Concello de Tui, en colaboración cos praceiros e praceiras, súmase á campaña “Quere o teu mercado”, para promocionar a praza de abastos.