O número de visitantes na Oficina de Turismo creceu un 37% en maio con respecto ao mesmo mes do ano pasado
No último mes 3.013 persoas pasaron por este punto de información turística
Os datos estatísticos da Oficina Municipal de Turismo do pasado mes de maio confirman a tendencia do progresivo incremento na afluencia de visitantes á nosa cidade ao longo do presente ano. En maio foron atendidos 3.013 visitantes o que supón un incremento do 37% con respecto ás 2.199 persoas atendidas hai un ano.
O crecemento rexístrase tanto no número de peregrinos coma de turistas que pasaron en maio por este punto de información. Así rexistráronse en maio 1194 peregrinos fronte aos 918 de 2024, o que representa un aumento do 30%. Creceu de forma especial o número de turistas que pasa de 1.281 no pasado ano a un total de 1.819 neste ano 2025, cun incremento do 42%.
O desglose destes datos permite comprobar como os peregrinos internacionais (835) superan amplamente aos procedentes de España (359)
As orixes dos peregrinos internacionais confirman como Estados Unidos e Alemaña son os principais países de procedencia dos peregrinos polo Camiño Portugués: EEUU (154), Alemaña (128 ), Reino Unido (38), Canadá (34), Irlanda (33), Australia (27), Taiwán (27) ... Pola súa banda, Madrid e Barcelona manteñen a súa primacía entre os españois: Madrid (55), Barcelona (37), Biscaia (33), Valencia (30), Alacante (24), Las Palmas (22), Tenerife (16) ...
Ao contrario, no que atinxe aos turistas a primacía dos turistas españois é clara (1650) fronte aos estranxeiros (169). Estes últimos chegan especialmente dende Portugal (67 ), Francia (22 ), Alemaña (21), Reino Unido (12), EEUU (11), Arxentina ( 9 ), Brasil ( 5 ) ... Pola súa banda, as orixes dos turistas nacionais son: Madrid (373 ), Málaga (214 ), Ourense (205), Huelva (132), Barcelona (86), Valladolid (85), Salamanca (68) ...
A concelleira de turismo tudense, Ana María Núñez Álvarez, expresa a súa satisfacción por este datos estatísticos que consolidan a crecente tendencia na afluencia de visitantes á nosa cidade que contribúen eficazmente ao dinamismo económico da cidade, á consolidación do seu sector turísticos e ao posicionamento de Tui como unha das referencia turísticas do sur de Galicia.