A aula da UNED de Tui acolle o curso de verán sobre a comunicación do cambio climático
Terá lugar do mércores 2 ao venres 4 de xullo contando coa participación de destacados relatores
A aula da UNED de Tui acolle o curso de verán “La comunicación del cambio climático en España” entre o mércores 2 e o venres 4 de xullo.
Durante tres xornadas, destacados relatores e expertos impartirán conferencias sobre a cobertura do cambio climático nos medios de comunicación españois, a súa evolución, a desinformación e sobre recursos enerxéticos.
Por parte da Axencia Estatal de Meteoroloxía participarán Esteban Rodríguez, físico, meteorólogo e xefe da Área de Avaliación e Modelización do Clima; José Ángel Núñez, xefe da Sección de Climatoloxía da Delegación da AEMET na Comunitat Valenciana; María Edilia Miranda, analista da Área de Climatoloxía e Aplicacións Operativas; Javier Cano, biólogo e meteorólogo; Juan Jesús González, doutor en Física e meteorólogo; Andrés Chazarra, físico e meteorólogo; Rafael Sánchez, xefe da Unidade de Estudos e Desenvolvementos da Delegación Territorial de Galicia; Rubén del Campo, xefe da sección técnica da Área de Comunicación; e Beatriz Hervella, xefa da Unidade Técnica da Área de Relacións Internacionais.
Amais intervirán Martín Barreiro, físico e presentador de TVE; Mercedes Martín, licenciada en Ciencias do Mar e Medio Ambiente e comunicadora meteorolóxica en Antena 3; Ana Celia Vázquez, xornalista e presentadora da TVG; e Susana Bayo, meteoróloga de Telemiño (Ourense) e investigadora do Centro de Sistemas Enerxéticos do INESC TEC (Portugal).
Tamén participará David Cocero, profesor titular do Departamento de Xeografía da UNED.
O curso constará de 20 horas lectivas, con modalidade presencial na aula tudense (rúa Antero Rubín) ou en liña tanto en directo coma en diferido. A matrícula está xa aberta en https://extension.uned.es/actividad/idactividad/44139.
Até o 1 de xullo o prezo do curso é de 108 euros con matrícula ordinaria; 63 euros a reducida; e 32 € a superreducida. A partir do 1 de xullo (incluído) é de 124 euros a matrícula ordinaria; 75 euros a reducida; e 38 € superreducida.